മനുഷ്യൻ ദൈവത്തിന്‍റെ വായിൽനിന്നും വരുന്ന സകല വചനംകൊണ്ടും ജീവിക്കുന്നു സെപ്റ്റംബർ 16, 2026
മനുഷ്യൻ ദൈവത്തിൻ്റെ വായിൽനിന്നും വരുന്ന സകല വചനംകൊണ്ടും ജീവിക്കുന്നു
സെപ്റ്റംബർ 17, 2026
ഉല്പത്തി 3:1–24
ജിനു നിനാൻ
സാത്താൻ്റെ വഞ്ചന
======================================
സാത്താൻ ഒരിക്കൽ ദൈവത്തിൻ്റെ അധികാരത്തിനു കീഴിലുള്ള പ്രധാനദൂതനായിരുന്നു. എന്നാൽ അവൻ തന്നെത്താൻ താഴ്ത്തുവാൻ, ദൈവീക അധികാരത്തിനു കീഴിൽ നിൽക്കുവാൻ തയ്യാറായില്ല . പകരം ദൈവത്തോട് മത്സരിച്ചു , ദൈവസന്നിധിയിൽ നിന്ന് പുറത്താക്കപ്പെട്ടു.
ദൈവം സൃഷ്‌ടിച്ച മനുഷ്യനും സ്ത്രീയും ദൈവത്തിൻ്റെ സ്നേഹബന്ധത്തിൽ, ദൈവീക അധികാരത്തിനു കീഴിൽ ജീവിക്കുന്നിടത്തോളം അവരെ നശിപ്പിക്കാൻ കഴിയില്ലെന്ന് അവൻ അറിഞ്ഞിരുന്നു. പക്ഷേ, തന്നെപ്പോലെ അവരെയും മത്സരത്തിലേക്ക് വലിച്ചിഴയ്ക്കാൻ കഴിയുമെങ്കിൽ, അവർക്കും ദൈവത്തിൽ നിന്ന് വേർപ്പെടേണ്ടിവരും.
അതിനാൽ സാത്താൻ ഹവ്വയെ ലക്ഷ്യമാക്കി. അവളുടെ ഹൃദയത്തിൽ ദൈവത്തിൻ്റെ സ്നേഹത്തെപ്പറ്റി സംശയം വിതയ്ക്കുകയായിരുന്നു അവൻ്റെ തന്ത്രം. ദൈവം വിലക്കുകൾ, നിയന്ത്രണങ്ങൾ എന്നിവ ഏർപ്പെടുത്തിയത് സ്നേഹത്താൽ അല്ല; യഥാർത്ഥ സ്വാതന്ത്ര്യത്തിൽ നിന്ന് നിന്നെ തടയാനാണ് എന്നു അവൻ അവളെ വിശ്വസിപ്പിച്ചു.
സൂക്ഷ്മമായിരുന്നുവെങ്കിലും, അത്യന്തം അപകടകരമായൊരു സാത്താൻ്റെ സന്ദേശം: “അധികാരത്തിനു കീഴിൽ ഉള്ള സ്വാതന്ത്ര്യം യഥാർത്ഥമല്ല. ദൈവത്തിൻ്റെ അധികാരത്തിൽ നിന്ന് പുറത്തുവരിക, നീ ദൈവത്തെ പോലെ സർവ്വാധികാരിയാകും.”
സാത്താൻ അവളോട് തുടർന്ന് വാഗ്ദാനം ചെയ്തു: “ ദൈവീക അധികാരത്തിനു പുറത്തു കടന്നാൽ നിങ്ങൾ ഒരിക്കലും മരിക്കുകയില്ല. നിങ്ങളുടെ കണ്ണുകൾ തുറക്കും. നന്മയും തിന്മയും അറിയും.” മത്സരം ജീവനും സ്വാതന്ത്ര്യവും ജ്ഞാനവും തരുന്നു എന്നതാണ് അവൻ്റെ കള്ളം. എന്നാൽ , മത്സരം മരണമാണ് നൽകുന്നത് എന്നതാണ് ദൈവീക സത്യം .
ആദ്യ പാപം — ഹൃദയത്തിലെ മത്സരം
======================================
ഹവ്വ സർപ്പത്തിൻ്റെ വഞ്ചനയിൽ വീണു , ആ വാക്കുകൾ വിശ്വസിച്ചു. അവളുടെ ഹൃദയത്തിൽ ദൈവത്തോട് മത്സരിച്ചു , ദൈവീക അധികാരത്തിൽ നിന്നും ദൈവം കുടുംബത്തിൽ സ്ഥാപിച്ചിരുന്ന അധികാരക്രമത്തിൽ നിന്നും പുറത്തേക്കു നടന്നു. ഹൃദയത്തിലെ മത്സരമായിരുന്നു ഭൂമിയിലെ ആദ്യത്തെ പാപം.അതിനാൽ ഹവ്വ, ദൈവം നിയമിച്ച കുടുംബ വ്യവസ്ഥിതിയിലെ അധികാരത്തോട് മത്സരിക്കുന്ന എല്ലാവരുടെയും ആദ്യ മാതാവ് ആണ്.
എന്നാൽ ആദാമിനു മുന്നിൽ ഒരു തെരഞ്ഞെടുപ്പ് ഉണ്ടായി: ദൈവത്തെ അനുസരിച്ച് ദൈവീക അധികാരം ഉപയോഗിച്ച് വീട്ടിലെ മത്സരം തടയണോ, അല്ലെങ്കിൽ, ദൈവത്തെ കൂടാതെയുള്ള വീട്ടിലെ ഐക്യതയ്ക്കു വേണ്ടി ഭാര്യയുടെ അനുസരണക്കേടിൽ പങ്കുചേരണോ? ദൗർഭാഗ്യകരമായി, ആദാം ദൈവത്തോടല്ല, ഹവ്വയോടൊപ്പമാണ് ചേർന്ന് നിന്നത്.
ആദാം ഹവ്വയെപ്പോലെ വഞ്ചിക്കപ്പെട്ടതല്ല, ബോധപൂർവ്വം പരിണതഫലം അറിഞ്ഞു കൊണ്ട് തന്നെ ദൈവത്തിൻ്റെ അധികാരം അവൻ നിരസിച്ചു, സഹവാസം തകർത്തു. അതിനാൽ ആണ് തിരുവെഴുത്തു തുടച്ചയായി ആദം കൽപ്പന ലംഖിച്ചു , എന്നും ഹവ്വ വഞ്ചിക്കപ്പെട്ടു എന്നും പറയുന്നത്.
ഹവ്വയോട് ചേരാതെ ദൈവത്തോട് ചേർന്ന് നിന്നാൽ കുടുംബത്തിൽ ഭിന്നത ഉണ്ടാകും എന്നും, പകരം തല്ക്കാലം ഹവ്വയോട് ചേർന്ന് നിന്നാൽ 'സമാധാനം' ഉണ്ടാക്കാം എന്ന് ആദം കരുതിയിരിക്കാം. എന്നാല്‍ ദൈവീക സത്യങ്ങളെ തള്ളിക്കളഞ്ഞു കൊണ്ടുള്ള സമാധാനം നിലനില്‍ക്കുകയില്ല. കര്‍ത്താവ്‌ അത്തരം സമാധാനം ഉണ്ടാക്കുവാന്‍ അല്ല പകരം ദൈവീക സത്യങ്ങള്‍ക്ക് വേണ്ടി നില്‍ക്കുമ്പോള്‍ ഉണ്ടാകുന്ന ഭിന്നത ഉണ്ടാക്കുവാന്‍ ആണ് ഭൂമിയില്‍ വന്നത്. (ലൂക്കോസ് 12: 51)
കുടുംബത്തെയും , വലിയ കുടുംബമായ സഭയേയും പരിപാലിക്കുവാന്‍ നിയമിക്കപ്പെട്ടിരിക്കുന്ന വ്യക്തികള്‍ സഭയിലോ, കുടുംബ ത്തിലോ ഒത്തുതീര്‍പ്പുകരായി “സമാധാനം” ഉണ്ടാക്കുവാൻ വേണ്ടി മത്സര സ്വഭാവത്തിനു മുന്‍പില്‍ കണ്ണടയ്ക്കുന്നവര്‍ ആകരുത്.അത് കുടുംബത്തെയും സഭയെയും നശിപ്പിക്കും .
ഫലം ദൈവം മുന്നറിയിപ്പ് നൽകിയതു പോലെ തന്നെയായിരുന്നു: അവർ ആത്മീയമായി മരിച്ചു, ജീവൻ്റെയും പ്രകാശത്തിൻ്റെ യും ഉറവിടത്തിൽ നിന്ന് വേർപ്പെട്ടു. അവർ സാത്താൻ്റെ അധികാരത്തിനു കീഴിൽ ആയിത്തീർന്നു. ദൈവീക അധികാരത്തിൽ നിന്നും സ്വതന്ത്രരാകാൻ ശ്രമിച്ചവർ പിശാചിനെയും പാപത്തിൻ്റെ യും അടിമകളായി. ദൈവത്തോടുള്ള കൂട്ടായ്മ തകർന്നു; ഉടൻ തന്നേ അവർ തമ്മിലുള്ള തമ്മിലുള്ള കൂട്ടായ്മയും തകർന്നു . മത്സരം, ഭയം, ലജ്ജ, കുറ്റം, കുറ്റാരോപണം എന്നിവ കൊണ്ട് അവരുടെ കുടുംബ ജീവിതം നശിച്ചു. ഒടുവിൽ, അവർ ദൈവസന്നിധിയിൽ നിന്ന് പുറത്താക്കപ്പെട്ടു, ശപിക്കപ്പെട്ട ലോകത്തിലേക്ക്.
സ്വാതന്ത്ര്യത്തിൻ്റെ വാഗ്ദാനം
======================================
എന്നിരുന്നാലും, ന്യായവിധിക്കിടയിലും ദൈവം കരുണയോടെ ഒരു വാഗ്ദാനം നൽകി: സ്ത്രീയുടെ സന്തതി ഒരുനാൾ സർപ്പത്തിൻ്റെ തല ചവിട്ടിത്തകർക്കും. തൻ്റെ പുത്രൻ മുഖാന്തരം ദൈവം മനുഷ്യൻ്റെ തകർന്ന ബന്ധം പുനസ്ഥാപിക്കുകയും മനുഷ്യഹൃദയത്തിലെ മത്സരം അവസാനിപ്പിക്കുകയും ചെയ്യും.
ഈ വാഗ്ദാനം യേശുക്രിസ്തുവിൽ നിറവേറ്റപ്പെട്ടു. ക്രൂശിൽ അവൻ സാത്താനെ തോൽപ്പിച്ചു, അവൻ്റെ ശക്തിയെ തകർത്തു. സത്യസുവിശേഷം കേട്ടു, മാനസാന്തരപ്പെട്ടു , ക്രിസ്തുവിനെ കർത്താവായി സ്വീകരിക്കുന്നവർ സാത്താൻ്റെ അടിമത്തത്തിൽ നിന്ന് വിടുതൽ പ്രാപിക്കുന്നു; വീണ്ടും ദൈവത്തിൻ്റെ അധികാരത്തിനു കീഴിലേക്ക് മാറ്റപ്പെടുന്നു.
ക്രിസ്തുവിൽ പുതിയ ജീവൻ
======================================
വീണ്ടും ജനനത്തിലൂടെ ദൈവം വീണ്ടും നമ്മുടെ പിതാവായിത്തീരുന്നു . നാം അവൻ്റെ പുത്രന്മാരും പുത്രിമാരും ആകുന്നു; ആത്മാവിൽ അവനോടുള്ള കൂട്ടായ്മയിലേക്ക് വരുന്നു . ദൈവീക അധികാരത്തിനു കീഴിലുള്ള കുടുംബത്തിൽ ഭർത്താവിനും ഭാര്യയ്ക്കും വീണ്ടും കൂട്ടായ്മയും , ഐക്യവും സമാധാനവും അനുഭവിക്കാം. ദൈവം ആഗ്രഹിക്കുന്നത്, നമ്മുടെയവനോടുള്ള ബന്ധം അച്ഛേദ്യമായ സ്നേഹത്താൽ, വിശ്വാസത്താൽ, അനുസരണത്താൽ അടയാളപ്പെടുത്തിയിരിക്കണമെന്നതാണ്.
എന്നിരുന്നാലും, സർപ്പം ഇന്നും നമ്മെ ദൈവത്തിൻ്റെ സ്നേഹത്തെപ്പറ്റി സംശയിപ്പിക്കുന്നു. അതേ കള്ളം ഇന്നും അവൻ പറയുന്നു . : “ദൈവം നിന്നെ യഥാർത്ഥമായി സ്നേഹിക്കുന്നില്ല , അതിനാൽ ആണ് ഈ നിയന്ത്രണങ്ങൾ … യഥാർത്ഥ സ്വാതന്ത്ര്യം ദൈവത്തിൻ്റെ അധികാരത്തിന് പുറത്താണ്.” എന്നാൽ നമ്മൾ ജയിക്കുന്നത്, പിതാവിൻ്റെ സ്നേഹത്തിൽ ഉറച്ചുനിൽക്കുന്നതിലൂടെ, അവൻ്റെ ജ്ഞാനത്തിൽ വിശ്വസിച്ചു, അവൻ്റെ വചനത്തെ അനുസരിച്ചു കൊണ്ടാണ്.
പ്രാർത്ഥന
======================================
അബ്ബാ പിതാവേ, ക്രൂശിൽ വെളിപ്പെട്ടിരിക്കുന്ന നിൻ്റെ മഹത്തായ സ്നേഹം ഒരിക്കലും സംശയിക്കാതിരിക്കാനുള്ള കൃപ തരണമേ. ആ സ്നേഹത്തിൽ വിശ്രമിക്കാനും, നിൻ്റെ ജ്ഞാനത്തിൽ പൂർണ്ണമായി ആശ്രയിക്കാനും, ഹൃദയപൂർവ്വം നിന്നെ അനുസരിക്കാനും ഞങ്ങളെ പഠിപ്പിക്കേണമേ. നിന്നെ സംശയിച്ച നിമിഷങ്ങൾ ക്ഷമിക്കേണമേ. വഞ്ചകനായവൻ്റെ വലയങ്ങളിൽ നിന്ന് ഞങ്ങളെ രക്ഷിക്കേണമേ. മത്സരംത്തിൻ്റെ എല്ലാതരം വിത്തുകളും ഞങ്ങളുടെ ഹൃദയത്തിൽ നിന്ന് നീക്കി കളയേണമേ. ജീവിതത്തിൻ്റെ ഓരോ മേഖലകളിലും നീ തന്നേ ഞങ്ങളെ പടി പടിയായി നടത്തിക്കൊള്ളേണമേ. അതിനുവേണ്ടി നന്ദി പറയുന്നു. ആമേൻ.